منزل

میں نے کہیں پڑھا تھا کہ اللہ کوئی چھوٹا سااسٹیشن نہیں بلکہ ایک بہت بڑاجنکشن ہے جس پر کئی راستوں سے پہنچاجا سکتا ہے۔ ایک راستہ عقل و دلیل کا ہے اور ایک راستہ عشق ودیوانگی کا۔ ایک راستہ جاننے کے بعد ماننے کا ہے اورایک ماننے کا ہے جس میں جاننے کی ضرورت ہی نہیں پڑتی۔

ایک ربط احساس و جذبے کا بھی ہے جسکے لئے بچوں کی سی معصومیت اور بے ساختگی کا ٹکٹ پاس ہونا ضروری ہے۔ یعنی راستہ الگ ہے لیکن منزل "اللہ" ایک ہے اب یہ ہم پر منحصرہے کہ ہم اُس تک کیسے پہنچتے ہیں۔

اصل جہیز

شادی کے دوسرے دن صائمہ خالہ کے گھر محلہ کی عورتوں کا تانتا لگ گیا تھا۔ کل صائمہ خالہ کے بڑے لڑکے کی شادی ہوئی تھی۔ 

صائمہ خالہ گھر آنے والی خواتین کی خاطر داری میں مصروف تھیں۔

اتنے میں کسی خاتون نے کہا۔ 

’’صائمہ خالہ خاطر تواضع تو شام میں بھی ہوتی رہے گی ابھی تو ہم بڑی بہو کا جہیز دیکھنے آئے ہیں۔‘‘

خالہ نے کہا ۔

’’ ٹھیک ہے۔ اﷲ کا کرم ہے کہ مجھے جہیز میں سب کچھ مل گیا ہے۔ دلہن کے کمرے میں آؤ میں تمہیں جہیز دکھاتی ہوں۔ ‘‘

پھر انھوں نے دلہن کا گھونگھٹ اٹھایا اور کہا۔ 

’’دیکھو یہ ہے میرا اصل جہیز!!‘‘